Английн зохиолч Диана Уинн Жонсын бүтээл "Цайзын цуврал" зохиолын 1, 2-р дэвтэр.

Ид шид, адал явдал, хайр дурлалыг хөгжөөнтэй хийгээд сургамжтайгаар өгүүлэх "Цайзын цуврал"-ын 1, 2р дэвтэр худалдаанд гарлаа.

1. Хаулын нүүдэг цайз

Ингари улсад амьдардаг Софи хэмээх 17 настай охин шулмын хараалд өртөж 90 настай эмгэн болчихно тэр. Хараалаа арилгуулахаар шидэт цайзыг зорих бөгөөд тэнд нь Хаул нэртэй, охидын зүрхийг иддэг шидтэн амьдардаг гэнэ...

Уг зохиолоос сэдэвлэн Японы алдарт Ghibli Studio анимэйшн бүтээсэн бөгөөд дэлхий даяар хүүхэд төдийгүй насанд хүрэгчдийн ч сэтгэлийг татсан гайхамшигтай зохиол юм.

1. Тэнгэр дэх цайз

Ингари нутгаас өмнө зүгт орших Рашпухт Султаны вант улсын Занзиб хотод Абдулла хэмээх залуухан хивсний худалдаачин амьдран суудаг байлаа. Хивсний худалдаагаа өргөжүүлэн амжилттай ажиллах хэдий ч, боломж л гарвал ханхүү болох хувь тавилангийн тухай тодоос тод мөрөөднө. Үзэсгэлэнт охин Шөнийнцэцэгтэй учирсан цагаас түүний мөрөөдөл биелж эхлэх нь тэр. Гэвч аймшигт бирд Шөнийнцэцэгийг хулгайлж тэнгэр лүү нисэн одов. Абдулла энэ хэргийн учрыг олж, охиныг аврахаар зориг шулуудаж, тун найдваргүй шидэт хивс, ааш муутай бяцхан бирдээр туслуулан урт холын бөгөөд тааварлашгүй адал явдлаар дүүрэн, шидэт аялалд гаржээ.

Занзиб нутагт эхэлсэн Абдуллагийн аялал Ингаригийн зүг хөтөлж, шидтэн Хаул, Софи, Калсифер, тэр ч бүү хэл нүүдэг цайзтай уулзан, бидний мэдэх түүхийн үргэлжлэлийг толилуулах аж.

“Надтай тохиролцвол ямар вэ? Чи миний гэрээг хүчингүй болгож өгвөл, би чиний хараалыг буцааж өгье” гэж галын савдаг хэлэв.

Ганцхан алхахад долоон бээр газар хороодог шидэт гутал, үл үзэгдэх нөмрөг зэрэг зүйл жинхэнээсээ оршдог Ингарий улсад аж төрөн суудаг Софи Хаттер охиныг хорон санаат Цөлийн шулам харааж орхино. Шулмын хараалаас ангижрахын тулд Софи уул толгодоор хэрэн хэсүүчилдэг нүүдэг цайз руу явдаг.

Харин тэр цайзад залуу охидын зүрхийг иддэг шидтэн Хаул амьдардаг гэнэ...

“Хүсэл биелүүлэхдээ би хэн нэгэнд ямар нэгэн сайн зүйл хийнэ гэж хэзээ ч хэлж байгаагүй” хэмээн бирд өгүүлээд “Ер нь бол, би аль болох их хор хөнөөл учруулна гэж тангарагласан юм” гэлээ.  

Даруухан хивсний худалдаачин Абдулла ханхүү болохыг мөрөөддөг байлаа. Гэтэл үзэсгэлэнт Шөнийнцэцэгтэй уулзсан цагаас түүний мөрөөдөл биелж эхлэх нь тэр.  

Нэгэн аймшигт бирд Шөнийнцэцэгийг аван тэнгэр лүү нисэн одоход Абдулла түүнийг аврахаар шийджээ. Хэрэв түүнийг олж чадвал, тэгээд бас араас нь хөөж буй элдэв хүмүүсээс бултаж чадвал түүнийг аварч чадах л байх. Гэвч ааш муутай бирд, тун найдваргүй шидэт хивс л түүнд тусалж байхад яаж амжилтад хүрэх билээ?  

Танд амьд явах тоотой хэдхэн өдөр үлдсэнийг мэдвэл та юу хийх вэ?

Карнеги Меллоны их сургууль олон жилийн турш “Сүүлчийн лекц” цуврал илтгэлийг зохион байгуулжээ. Хэрвээ таны сүүлчийн боломж гэдгийг мэдэж байх аваас хүн төрөлхтөнд ямар эрдэм ухаанаа хуваалцах вэ? Хэрвээ танд маргааш гэж үгүй бол хойч үедээ юуг өвлүүлэн үлдээхээ төсөөлөхийг илтгэгч профессоруудаас хүсдэг байв.

Эдгэршгүй хорт хавдартай хэмээн оношлогдсон профессор Рэнди Пошийн хувьд үүнийг төсөөлөх шаардлагагүй байлаа.

Түүний сүүлчийн лекц хошин мэдрэмж, урам зориг, мэргэн ухаанаар дүүрэн байж олон хүний амьдралыг өөрчлөх давтагдашгүй бүтээл болжээ.

Компьютер ашиглахгүйгээр код бичиж сурах боломжтой юу?“Сайн уу, Рүби?” ном маань яг л ийм зорилготой. Бага насны (5+) хүүхдэд тооцооллын сэтгэлгээг танилцуулах, дур сонирхлыг нь төрүүлэх зорилгоор Финландын зохиолч, зураач, программист Линда Лиукасын бичсэн энэхүү гурван цуврал ном маань 25 орчим хэлээр орчуулагдаж, олон орны уншигч хүүхдэд хүрчээ.Хүүхдийн нас, сэтгэхүйд тохиромжтой боловсролын агуулгыг бүтээх, сурталчлах, хүргэх зорилготой Линда “Сайн уу, Рүби?” цувралаараа дамжуулан асуудлыг задлах, зүй тогтлыг олох, алгоритмыг ойлгох, асуудлыг шийдвэрлэх, хамтран ажиллах зэрэг чадварыг хүүхдэд ойлгуулах, суулгахыг хүссэн юм.Цувралын эхний ном болох “Кодын ертөнцөөр аялсан адал явдал” номд маань бяцхан Рүби охин аавынхаа ажилдаа явахдаа үлдээсэн захидлын дагуу таван эрдэнэсийн чулууг олох аялалд гардаг. Замдаа тэр робот, оцон шувууд, цасны ирвэс гэх мэт хачирхалтай амьтадтай тааран найзална. Эдгээр амьтад бүгд программ хангамж, кодын хэлийг дүрсэлсэн, төлөөлүүлсэн амьтад байдгаараа онцлогтой. Рүби эрдэнэсийн чулуу бүрийг өөрийн болгохын тулд саад бэрхшээлийг давах хэрэгтэй болно. Ингэхдээ тэр логик сэтгэлгээ, том асуудлыг олон жижиг хэсэгт хуваах, зүй тогтлыг олж тогтоон өөрийн талд ашиглах гэх мэт аргуудыг ашигладаг. Рүби шантралгүй, тууштай зүтгэж, багаар ажиллаж, бусдад хүндэтгэлтэй хандаж, найз нөхөдтэй болохыг сонгосноор зорилгодоо хүрнэ.Номын тал хүртэл Рүбигийн адал явдалт түүх өрнөх бөгөөд түүний дараа дасгал ажлууд эхэлнэ. Дасгал ажлууд Рүбигийн туулсан адал явдалтай нягт холбоотой тул хүүхдэд Рүби шиг задлан шинжлэх, зүй тогтлыг олох гэх зэрэг тооцооллын сэтгэлгээг өөрөө ашиглах боломжийг олгодог.Тооцооллын сэтгэлгээ нь үндсэн дөрвөн хэсгээс буюу задаргаа, абстракц, зүй тогтол олох болон алгоритмаас бүрддэг. Номын гол үйл явдал ч энэ дөрвөн хэсэгтэй холбоотойгоор өрнөх бөгөөд дасгал ажлууд нь илүү тодорхой ойлгуулах, өөрөө хийж үзэх боломж олгох зорилготой. Гэхдээ дасгал ажил нь хичээл шиг, эсвэл заавал нэг зүйл сураад байгаа мэт бус харин Рүби ба түүний найзуудтай хамт тоглоод байгаа мэт сэтгэгдэл төрүүлдэг.“Сайн уу, Рүби?” номоор дамжуулан хүүхэд эрэлч хайгуулч, бүтээлч сэтгэлгээ, тууштай байдал, өсөх сэтгэхүй, багаар ажиллах зэрэг чадварт суралцахын хажуугаар компьютерын дэлгэц огт харалгүйгээр кодын зүй тогтол, суурь ухагдахууныг сонирхолтой байдлаар ойлгох боломжтой.

Аз жаргал гэж юу юм бол?

“Хүүхдийн философи” цувралын баатрууд маань гарт баригддаггүй зүйлсийг сэтгэлдээ төсөөлж, эрэн хайж, эргэцүүлэн боддог. Нэг асуултынхаа араас алсын алсад эрэл хайгуулд гардаг. Замын төгсгөлд асуултынхаа хариуг олохоос илүүтэй зөв асуулт асуух, зөв замыг сонгох, замын дунд алхам тутамдаа оюун ухаанаа тэлэх нь чухал билээ.

Энэхүү цувралыг хүүхэд багачууд болон асуулт асуухаас эмээдэггүй бүх хүнд зориулав.

Гол дүрийн охин маань уйдан, хийж суухаа олж ядан байхад ээж нь “Мөрөөдөөд үзээч” гэж хэлнэ. Охин ээжийнхээ хэлснээр мөрөөдөх гэж оролддог ч яаж мөрөөдөхөө мэдэхгүй.

Ингээд тэр асуултдаа хариулт олохоор гэр бүлийнхээ гишүүдээс зөвлөгөө авч, эцэст нь өөрөө хариултыг нь бодож олно. Хүүхдийн төсөөлөн бодох, уран сэтгэх чадварыг хөгжүүлэхээс гадна, эрэлч хайгуулч байх сэтгэлгээг дэмжинэ.

Гэгээ өглөө цайгаа ууж суухдаа ааваасаа ном уншаад өгөөч хэмээн гуйна. Гэвч аав нь ажилтай байсан тул нэг цагийн дараа уншиж өгье гэдэг.

Гэгээ нэг цагийг ганцаараа өнгөрөөх хэрэгтэй болно. Түүнд эхлээд цаг хугацаа огт явахгүй байгаа юм шиг санагдана. Ингэхэд цаг хугацаа гэж юу юм бол хэмээн эргэцүүлэн бодож эхлээд, номын төгсгөлд асуултынхаа хариултыг олно. Хүүхдэд одоо цагтаа байхын чухлыг, цаг хугацаа гэгч нүдэнд үзэгдэхгүй зүйлийн талаарх ойлголтыг өгнө.

12 нүүртэй, нимгэн ном

Хүн, байгаль ертөнц, амьтан, эд зүйлс зэрэг хүүхдүүдтэй хамгийн танил зүйлсийг хялбар, эгдүүтэй зурах 95 санааг оруулж, зурах дарааллыг заасан. Хүүхдэд давхарлаж зурах, өөрөө дуурайж зурах боломжтой хэсгийг мөн оруулж өгсөн бөгөөд хүүхэд анхандаа дагаж, дуурайж сураад дараа нь өөрөө сэтгэн бодож, хүссэн зүйлээ зурдаг болоход энэхүү ном тусална.

Гарын жижиг булчинг хөгжүүлэх үр дүнтэй аргуудын нэг нь зураг зурах юм. Эдгээр булчинг хөгжүүлэх нь суралцах үйл явцад чухал нөлөөтэй. Ялангуяа бага насанд гарын жижиг булчингаа сайн хөгжүүлж чадвал цаашлаад сургуульд орох үедээ хүүхдийн гар цуцаж ядрахгүй, сайхан, цэгцтэй бичиж сурдаг.

Мөн зураг зурах нь тархийг амрааж, сэтгэн бодох, бүтээлч чадварыг хөгжүүлж өөрийгөө илэрхийлэх нэг арга болдог. Тиймээс зөвхөн хүүхэд гэлтгүй томчууд ч энэхүү номыг ашиглан тархиа амрааж, цагийг зугаатай өнгөрүүлэх боломжтой.

/126 өнгөт нүүртэй, хатуу хавтастай, 190х140мм хэмжээтэй/

Кокогийн алдартай 30 эшлэлд орчин цагийн хэв маягийг шингээн, зөвлөгөөг нь өнөө цагт тааруулан шинэчилж энэхүү номыг уншигч танд өргөн барьж байна.

Нэгэн зууны тэртээ, Коко Шанел эмэгтэйчүүдийн хувцасны донж маягийг эрс шинэчилжээ. Тэрээр эрэгтэй загварын хэв маягийг шингээж, эмэгтэйчүүдийг бариу корсетоос ангижруулахыг хүссэн бөгөөд түүний торгон нарийн мэдрэмж загварын чиг хандлагыг бүхэлд нь өөрчилсөн нь одоо ч үнэ цэнтэй хэвээр байна. Дэгжин хар даашинз, 2.55 цүнх, хоёр өнгийн шаахай зэрэг алдартай бүтээл нь хувцас загварт үнэтэй хувь нэмэр оруулж, Кокогийн нэр хүндийг өндөрт өргөжээ.

Түүний үл хуучрах гайхамшигт зөвлөгөөнүүд нь “je ne sais quoi” буюу үгээр илэрхийлшгүй үнэ цэнийг өдөр бүр бидэнд өгсөөр байна гэдэгт итгэлтэй байна.

Загвар бүтээгчид ертөнцийг бүтээж, загварчлах сэтгэлгээ асуудлыг шийддэг гэвэл та санал нийлэх үү?

Ажлын байр, гудамж талбай, гэр орон эсвэл алганд багтах ухаалаг утас, сууж буй сандлаа нэг хараарай. Энэ бүгдийг хэн нэгэн бүтээж, загварыг нь гаргасан. Загвар бүр бүтээгчийнхээ эсвэл бүтээж буй багийн шийдвэрлэхийг хүссэн ямар нэг асуудлаас эхлэлтэй байдаг. Таны асуудалд ч мөн шийдэл бий.

Стэнфордын их сургуулийн профессор Билл Бернэтт, Дэйв Эванс нар энэхүү номдоо хэн, хаана, юу хийж байгаа, эсвэл амьдралынхаа төлөө юу хийсэн, хөгшин, залуу гэдгээс үл хамааран амьдралыг утга учиртай, сэтгэл хангалуун байлгахад загварчлах сэтгэлгээ хэрхэн тусалж болохыг харуулжээ. Тэд гайхамшигтай технологи, бүтээгдэхүүн, хүрээлэн буй орчныг бүтээдэг загварчлах сэтгэлгээг ашиглаж сэтгэл хангалуун, баяр баясгалантай, бүтээлч амьдралыг цогцлоох боломжтойг олон зуун оюутны баялаг туршлагаас үндэслэн боловсруулсан арга барилаараа нотолж чадсан юм.

Дэлхийн хамгийн аз жаргалтай 10 орны тоонд Финланд, Дани, Норвег, Швед, Исланд улс байнга багтдаг нь учиртай!

Энэхүү номоос зуун зууныг дамжсан нордикуудын мэргэн ухаан, сэтгэл хангалуун амьдрах нууцыг олж мэдээрэй.

Лагом: Их ч биш, бага ч биш - Тунг нь тааруулах (Швед) 

Фрилустлив: Байгаль, эх дэлхийтэй ойр байх (Норвег) 

Фика: Өдөр тутмын цайны завсарлага хийгээд бусад таатай зан үйл (Швед) 

Хюга Ая тух гэдэг нь тайвшрал, урам зориг, баяр хөөрийг авчрах шидтэй (Дани) 

Люкке: Аз жаргал таны эргэн тойронд бий (Дани) 

Сису: Бэрхшээлд сөхрөлгүй, зоригтой, тэвчээртэй, шийдэмгий байх (Финланд) 

Тета Редаст: Бүх зүйл болно доо (Исланд) 

Том шийдвэр гаргахдаа та юу хийдэг вэ? Зөн совингоо дагадаг уу? Эсвэл давуу ба сул талыг жагсаан бичиж, бүтэлгүй үр дүн дагуулсан шийдвэрээ ахин дахин бодож, өөрийн үзэл бодолд нийцэх бусдын саналыг эрэн хайдаг уу? Гэтэл эдгээр нь зөв шийдвэр гаргах боломжийг багасган биднийг төөрөгдөлд оруулдгийг уг номд шинжлэх ухааны үндэслэлтэй тайлбарлаад зогсохгүй чанартай шийдвэр гаргах арга замыг танд зааж өгнө.

Мэргэжлийн покерчин, шийдвэр гаргах стратегийн мэргэжилтэн Энни Дьюк энэ номыг бичсэн. Иймдээ ч текстээр дүүрэн энгийн ном бус дасгал ажил бүхий интерактив бүтээл болжээ. Танд ямар үед хурдан шийдэж цагаа хэмнэх, ямар үед тунгаан бодож цаг зориулах шаардлагатайг ч хэлж өгнө.

Хөрөнгө оруулалт хийх, ажлаа солих, эсвэл гэр бүлийн амьдралд тулгарах чухал шийдвэр гээд таны амьдралыг өөрчилж ч магадгүй томоохон шийдвэрээс эхлээд, өдөр бүр хэдэн мянган жижиг шийдвэр гаргахдаа ч өөртөө итгэлтэй, зөв шийддэг болохыг хүсвэл “Шийдвэр хэрхэн гаргах вэ?” номыг өөрийн номын сандаа заавал нэмээрэй.

Ухаалаг бөгөөд үзэсгэлэнтэй залуу бүсгүй Эстер Грийнвүүд нь авьяас билиг, амжилт бүтээлээр дүүрэн нэгэн. Нью-Йорк хотын нэгэн алдартай сэтгүүлд дадлага хийх 12 хүний нэгээр сонгогдсоноор зохиолч болох мөрөөдлөө биелэх нь хэмээн баярладаг. Гэвч дадлагын хөтөлбөрт багтсан үдэшлэг, загварын үзүүлбэр, хүлээн авалтын шахуу хуваариудын зэрэгцээ уул овоо шиг их гар бичмэлийн дунд Эстер хяналтаа алдаж төөрөлдөж эхэлнэ. Энэ амьдралаас явахыг хүсэх хүртлээ сэтгэл зүйн хямралд орсон залуу бүсгүйн бодол, сэтгэлд чухам ямар шуурга шуурч байсныг нэн үнэмшилтэй агаад уран яруу дүрсэлжээ.

Пулицерын шагналт зохиолч, яруу найрагч Силвиа Платын 1963 онд, өөрийн амьдралаас сэдэвлэн бичсэн "Хонхон шил" зохиол нь түүний цорын ганц үргэлжилсэн үгийн зохиол бөгөөд орчин үеийн сонгодог зохиолын тоонд зүй ёсоор багтдаг.

Жаахан дээрэлхүү даргатай боловч хүний нөөцийн албандаа гомдол гаргах, ажлаа хаяад зугтах, ажлаас гарах өргөдлөө өгөх ямар ч боломжгүй хэцүүхэн ажил бол ээжийн ажил. Ээж байна гэдэг үнэхээр гайхалтай, сайхан зүйл гэдгийг тайлбарлах, эсвэл хэрхэн мундаг ээж болох тухай өгүүлэх хэдэн арван ном, зохиол байдаг ч яг энэ ном шиг бодит үнэнийг шулуухан бичсэн нь туйлын ховор билээ. (За даа, ер нь байхгүй дээ)

Номын зохиогч Кэт, Нат хоёр нийт 7 хүүхэдтэй ба “Ээжүүдийн нүцгэн үнэн” нэртэй богино видео бичлэгүүдийг сошиал сүлжээнд оруулж анх олонд танигджээ. Тэдний өвөрмөц хошин мэдрэмж, юу ч нуулгүй, нэмж хачирлалгүй өгүүлэх бодит түүхүүд нь та л ганцаараа нусаа хацартаа наан, ядарч зүдрээгүйг ойлгуулж, тайвшруулж чадна. Ээжүүдийн тухай Instagram-аас хэзээ ч олж харахгүй бодит үнэн, эмнэлэг рүү авч явсан ч хэрэглээгүй зүйлсээс эхлээд хүүхэд гараах гарах хүртэл өөр хэн ч хэлж өгөхгүй бүхнийг “Ээжүүдийн нүцгэн үнэн” ном хуваалцана.

Төгс төгөлдөр ээжийн тухай үлгэр домог хийгээд төгс ээж болох гэсэн дарамтын эсрэг зоримог зогсож, та аль хэдийн хангалттай сайн ээж гэдгийг нотолно. Яг л найзтайгаа ярилцаж буй мэт хамтдаа инээж, хамтдаа тайвширч, хамтдаа бодит үнэнийг хүлээн зөвшөөрөх төдийгүй ээжийн завгүй өдрүүдийн хэдийд ч барин тавин уншихад нэн тохиромжтой ном юм.

Арван хэдэн жилийн өмнө, англи хэлний багш Жек Ма Алибаба-г байгуулсан нь өдгөө хэдэн зуун сая хэрэглэгчтэй интернэт худалдааны эзэнт гүрэн болж цогцолж, Walmart, Amazon- тай өрсөлдөхүйц дэлхийн шилдэг компани болжээ. 2014 онд IPO гаргаж, 25 тэрбум долларыг хөрөнгийн зах зээлээс босгосон нь дэлхийн санхүүгийн зах зээлийн түүхэн дэх хамгийн том амжилт юм. Энэ номын зохиогч Данкан Кларк 1999 онд Алибаба-гийн анхны оффис болох жижигхэн сууцанд Жектэй танилцаж, тус компанийг дөнгөж байгуулагдсаны дараа зөвлөхөөр нь ажиллаж байв. Тухайн үед Жек түүнд Алибабагийн 100’000 гаруй хувьцааг, нэгж хувьцааг 30 центээр авах боломжийг өгчээ. Харамсалтай номын зохиолч энэ саналд татгалзаж, 30 сая долларын алдаа хийх нь тэр. 2014 оны 9-р сард Алибаба IPO гаргаж, өнөөх гайхамшигт шийдвэр 30 сая долларын алдаа болж хувирчээ. Жек Алибаба группийн амжилтыг эмэгтэй ажилчидтайгаа үргэлж холбодог. Алибабагийн нийт ажилчдын 47 хувь нь, үүсгэн байгуулагчдын 1/3 нь эмэгтэйчүүд билээ.

Жек Ма-гийн бүтээсэн Алибаба хэмээх эзэнт гүрний сэтгэл хөдлөм түүхээр хамтдаа аялцгаая

Энэхүү номд ирээдүйд ямар мэргэжилтэй, ямар хүн болохоо шийдэж ядан, хүлээж тэсэлгүй төсөөлөн мөрөөдөх нэгэн жаал хүүгийн тухай өгүүлдэг.

Мэргэн харваач, сансрын нисгэгч, тоглоомын засварчин, дэлхийгээр аялагч, зохиолч эсвэл бүр шувуу судлаач… Ирээдүйгээ төсөөлөн мөрөөдөхдөө бүх зүйлийг нэг дор бас яг одоо хийхийг хүсэж яарах жаалхан хүү.

Ирээдүйн тухай мөрөөдөлд нь “одоо” цаг саад болох үед аав нь хүүгийнхээ чихэнд ийн шивнэнэ: “Тэр үед өнөөдрийн бяцхан хүүгийн мөрөөдөл чамайг ч хүртэл гайхшируулах болно.”

Мөрөөдлөөр аялагч номыг хил хязгааргүй хүсэл мөрөөдлийнхөө ертөнцөөр өнөөдрөөс маргаашид тэмүүлж, ирээдүйд ямар хүн болохоо төсөөлөн суугаа бүх хүүхдэд зориулав.